Sodes moitos os que nos preguntades esta diferenza. Hoxe queremos presentar estes termos para aclarar as vosas dúbidas:
- OFERTA DE EMPREGO PÚBLICO: instrumento empregado pola Administración Pública para indicar aqueles postos vacantes que se cubrirán mediante un proceso selectivo. A Administración Pública terá 3 anos improrrogables para convocar os mesmos.
- CONVOCATORIA: instrumento polo que se publican as bases reguladoras dun procedemento selectivo. Coa convocatoria comeza o prazo para presentar a instancia e poder formar parte dese proceso. Ademais, o proceso de oposición comeza aquí.
Deste xeito, é moito máis eficaz comezar coa preparación antes de ser convocado, pois, por exemplo, na última convocatoria da Administración xeral do Estado nos grupos C1 e C2 estableceuse un período máximo de 4 meses para realizar os exames. Así, os que comezaron a súa preparación antes puideron presentarse ao exame co programa ben preparado, mentres que os que decidiron comezar o seu estudo coa publicación da convocatoria só tiveron uns meses, que quizais non sexan suficientes.
Para comezar a prepararnos antes da convocatoria, tomamos como referencia a última convocatoria publicada, que normalmente é similar ou ten pequenas modificacións.
Agardamos que vos sexa de utilidade toda esta información. Podedes enviarnos as vosas preguntas ou chamarnos. Non dubidedes en facelo!